|
फाइल तस्वीर

काठमाडौँ : सन् २०२३ को ११ महिनामा ९ लाखभन्दा बढी विदेशी पर्यटक नेपाल भित्रिएका छन्।

नेपाल पर्यटन बोर्डको तथ्याङ्कअनुसार वर्षको जनवरीदेखि नोभेम्बरसम्म ९ लाख १८ हजार ३०८ जना पर्यटक नेपाल आएका हुन्। नोभेम्बरमा नै १ लाख ८ हजार ६३० विदेशी पर्यटक नेपाल भित्रिएका छन्।

अघिल्लो महिना अक्टोबरमा हालसम्मकै बढी १ लाख १७ हजार ३०६ पर्यटक नेपाल भित्रिएका थिए। पर्यटक आगमनको पछिल्लो आँकडाले यो वर्ष सरकारको लक्ष्य पूरा हुने सङ्केत देखिएको छ। सरकारले सन् २०२३ मा १० लाख विदेशी पर्यटक भित्र्याउने लक्ष्य लिएको छ।

बोर्डका निर्देशक मणिराज लामिछानेले पर्यटक आगमन निरन्तर बढिरहेकाले लक्ष्यमा पुग्न सहज हुने उल्लेख गरे। उनले भने, ‘११ महिनामा ९ लाख १८ हजारभन्दा बढी पर्यटक आएका छन्। १० लाखको लक्ष्य करिब पुग्न लाग्यो।’

पर्यटक आगमनको मुख्य स्रोतबजार छिमेकी मुलुक भारत, चीन तथा संयुक्त राज्य अमेरिका, बेलायत, अष्ट्रेलिया, श्रीलङ्का, बङ्गलादेश रहेको बोर्डले जनाएको छ।
नोभेम्बरमा कुल पर्यटक आगमनमध्ये २० प्रतिशत भारतबाट आएका छन्। सो अवधिमा भारतबाट हवाईमार्ग भएर २४ हजार ४४३ जना पर्यटक नेपाल आएका छन्।

संयुक्त राज्य अमेरिकाबाट ११ हजार ४६१ जना नेपाल आउँदा अर्को छिमेकी मुलुक चीनबाट ७ हजार ६०१, बेलायतबाट ६ हजार १३८, अष्ट्रेलियाबाट ५ हजार ६०, थाइल्याण्डबाट ३ हजार ७६१, जर्मनीबाट ३ हजार ५१२, श्रीलङ्काबाट ३ हजार २२८ र फ्रान्सबाट ३ हजार २०५ जना पर्यटक भित्रिएका छन्।

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.